យើងត្រូវកសាងសម្ព័ន្ធសាមគ្គីភាពជាបងប្អូន​រវាងស្ត្រីទូទាំងសាកលលោក ។ នៅពេល ដែលស្រ្តីជួយគាំទ្រគ្នាទៅវិញទៅមក យើងនឹងអាចធ្វើឱ្យសម្រេចនូវគោលដៅកាន់តែធំ និងរួមចំណែក​កាន់​តែច្រើនធ្វើឱ្យ​សង្គមជាតិមានវឌ្ឍនភាព

នៅក្នុងបរិការណ៍កូវីដ-១៩ បានបង្រៀនយើងឱ្យខិតខំពង្រឹងកិច្ចសហប្រតិបត្តិការ ភាពជាដៃគូ និងរួបរួមគ្នាជំនះឧបសគ្គ ដើម្បីឆ្ពោះទៅកាន់អនាគតក្រោយវិបត្តិកូវីដ-១៩ ទទួលបានភាពរុងរឿង និងភាពរីកចម្រើនដោយបរិយាប័ន្ន។

ស្ត្រី និងក្មេងស្រី ចូលរួមអនុវត្តវិធានការរបស់រាជរដ្ឋាភិបាល និងប្រែក្លាយវិបត្តិនេះ ឱ្យទៅជាកាលានុវត្តភាព (ឱកាស) ដើម្បីការអភិវឌ្ឍ និងបង្ហាញពីសក្តានុពល និងភាពខ្លាំងរបស់យើង លើភាពធន់ និងឆ្លើយតបនឹងការរីករាលដាលនៃជំងឺកូវីដ-១៩។

ស្ត្រី និងក្មេងស្រី ត្រូវហ៊ានបង្កើតក្ដីសុបិន្តឱ្យធំ ( Dream big )​ និងកណត់គោលដៅរបស់ខ្លួនឲ្យធំ ( Aim big ) ហើយត្រូវប្រើប្រាស់សក្តានុពល ទេពកោសល្យ និងគំនិតច្នៃប្រឌិតរបស់ខ្លួនដើម្បីធ្វើដំណើរឆ្ពោះទៅមុខសម្រេចឱ្យបាននូវក្ដីសុបិន្ដនិងគោលដៅនោះ។ សូមសង្គម និងក្រុមគ្រួសារមេត្តាបន្តវិនិយោគលើស្រ្តីនិងក្មេងស្រី និងជួយគាំទ្រស្រ្តីឱ្យទទួលបានឱកាស និងការឡានុវត្តភាពក្នុងការបំពេញតួនាទីរបស់ខ្លួនឱ្យបានពេញលេញនៅក្នុងសង្គម។  

ការបង្កើនចំនួនរបស់ស្រ្តីក្នុងវិស័យច្បាប់ និងប្រព័ន្ធតុលាការ ជាកត្តារួមចំណែកមួយដ៏សំខាន់ក្នុងការបង្កើនលទ្ធភាពទទួលបានយុត្តិធម៌សម្រាប់ស្រ្តីរងគ្រោះជាស្រ្តី និងក្មេងស្រី ឆ្ពោះទៅការពង្រឹងនីតិរដ្ឋ។ បង្កើនការផ្ដល់សេវាផ្លូវច្បាប់ដោយស័្មគ្រចិត្ត និងមិនគិតកម្រៃ ( pro bono basis ) ដល់ក្រុមងាយរងគ្រោះដទៃទៀត ដើម្បីលើកកម្ពស់សមធម៌ និងបរិយាកាសប័ន្នសង្គម ស្របតាមទិសស្លោកនៃគោលដៅអភិវឌ្ឍន៏ប្រកបដោយជីវភាពគឺ មិនទុកនរណាម្នាក់ចោល( No one wil be left behind) ។

ខ្ញុំសូមកោតសរសើរនៅទីនេះក្នុងថ្ងៃនេះនូវតួនាទីរបស់អង្គការសង្គមស៊ីវិល ជាពិសេស អង្គការដែល​ធ្វើការ​​ពាក់ព័ន្ធនឹងស្ត្រី ហើយខ្ញុំសូមសង្កត់ធ្ងន់នូវតម្រូវការក្នុងការបញ្ឈប់ការមិនយក​ចិត្តទុកដាក់ពីសង្គមចំពោះស្ត្រីដែលជាក្រុមជនងាយរងគ្រោះ ដូចជា ស្ត្រីចាស់ជរា កុមារី ស្ត្រីពិការ ស្ត្រីមាន​ផ្ទុកមេរោគអេដស៍ និងជម្ងឺអេដស៍ ស្ត្រីជាជនដើមភាគតិច ស្ត្រីស្រឡាញ់ភេទដូចគ្នា និងស្ត្រីទ្វេរភេទ ស្ត្រីរស់នៅតំបន់ដាច់ស្រយាល និងស្ត្រីធ្វើការនៅកន្លែង​កំសាន្ត​របស់​បុរស (ប្រសាសន៍ថ្លែងនៅក្នុងទីក្រុងហ្សឺណែវ ប្រទេសស្វីស ខែតុលា ឆ្នាំ ២០១៣)។​

ស្ត្រីគឺជាឃ្លាំងតែមួយគត់ដែលមានផ្ទុកនូវភាពស្វាហាប់ និងវឌ្ឍនភាព។ យើងមានចិត្តចង់ចូលរួមចែករំលែក និងហ៊ានមានក្តីស្រមៃ! (ប្រសាសន៍ថ្លែងនៅក្នុងខេត្តសៀមរាប ប្រទេសកម្ពុជា ខែកក្កដា ឆ្នាំ ២០១២)។