ពិធីចែកម៉ាសដល់កម្មការិនីរោងចក្រដែលជាអំណោយរបស់សម្តេចតេជោ និងសម្តេចកិត្តិព្រឹទ្ធបណ្ឌិត

សូមអញ្ជើញទស្សនា វេទិកាយុវវ័យជជែកពិភាក្សា ស្តីពីសមភាពយេនឌ័រ ដែលរៀបចំដោយក្រសួងកិច្ចការនារី នឹងចាក់ផ្សាយតាមកាលបរិច្ឆេទដូចខាងក្រោម ៖ -ថ្ងៃសុក្រទី ៤ វេលាម៉ោង ៩-១០ យប់ – ថ្ងៃអាទិត្យទី ៦ វេលាម៉ោង ១០-១១ ថ្ងៃ – ថ្ងៃច័ន្ទទី ៧ វេលាម៉ោង ១០-១១ ថ្ងៃ – ថ្ងៃអង្គារ ទី ៨ វេលាម៉ោង ១០-១១ ថ្ងៃ – ថ្ងៃ សុក្រ ទី ១១ វេលាម៉ោង ៩-១០ យប់ – ថ្ងៃ សុក្រ ទី ១៨ វេលាម៉ោង ៩-១០ យប់ តាមរយៈស្ថានីយ៍ទូរទស្សន៍ជាតិកម្ពុជា (ទទក)

មន្ទីរកិច្ចការនារីរាជធានីភ្នំពេញ៖   វគ្គបណ្តុះបណ្តាលអប់រំផ្សព្វផ្សាយស្តីពី ការចិញ្ចឹមកូនបែបវិជ្ជមាន ដល់អ្នកទទួលបន្ទុកកិច្ចការនារីនិងកុមារសង្កាត់ទាំង៨ និងប្រជាពលរដ្ឋក្នុងមូលដ្ឋាន ក្រោមកិច្ចសហការណ៍ជាមួយការិយាល័យសង្គមកិច្ចនិងសុខមាលភាពសង្គម និងរដ្ឋបាលខណ្ឌ៧មករា ។   វគ្គបណ្តុះបណ្តាលនេះមានគោលបំណងឆ្លុះបញ្ចាំងពី ការចិញ្ចឹមបីបាច់ដែលពួកគាត់បានធ្លាប់ឆ្លងកាត់ផ្ទាល់កាលនៅកុមារភាព និងដើម្បីឱ្យពួកគាត់ពិចារណា អំពីវិធីសាស្រ្តដែលពួកគាត់បានប្រើក្នុងការចិញ្ចឹមកូននាពេលបច្ចុប្បន្ន។ ព្រមទាំងពួកគាត់ដឹងថា ការប្រៀនប្រដៅកូនបែបអវិជ្ជមាន ដោយការរំលោភបំពាន នឹងបង្កផលប៉ះពាល់យ៉ាងច្រើន ដល់ការវិវឌ្ឍន៍របស់កូនពិតប្រាកដមែន ។   អ្នកចូលរួម ចំនួន ៤៧នាក់ (ស្រី្ត ៣៧នាក់) បានយល់ដឹងកាន់តែច្បាស់អំពីការចិញ្ចឹមកូនបែបវិជ្ជមាន ដោយបានបញ្ចេញនូវមតិយោបល់យ៉ាងផុលផុស ។ ពួកគាត់បេ្តជ្ញាថានឹងយកនូវចំណេះដឹងដែលទទួលបានទៅអនុវត្ត និងផ្សព្វផ្សាយឱ្យកាន់តែល្អប្រសើរថែមទៀត។ ចំពោះវគ្គអប់រំផ្សព្វផ្សាយនេះទទួលបានការឧបត្ថម្ភគាំទ្រពីរដ្ឋបាលសាលា ខណ្ឌ៧មករា និងធ្វើឡើង កាលពីថ្ងៃទី២៧ ខែឧសភា ឆ្នាំ២០២០ នៅសាលាខណ្ឌ៧មករា។

មន្ទីរកិច្ចការនារីខេត្តប៉ៃលិន៖   មន្ទីរកិច្ចការនារីបានចូលរួមរៀបចំ ពិធីចែកអំណោយដល់គ្រួសារស្ត្រីងាយរងគ្រោះ និងផ្សព្វផ្សាយពីវិធីកាត់បន្ថយហានិភ័យពីការឆ្លងជំងឺកូវីដ ១៩ នៅឃុំទូ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។ ពិធីចែកអំណោយនេះមានការចូលរួមពី ឯកឧត្តម អភិបាលនៃគណៈអភិបាលខេត្ត សមាជិកក្រុមប្រឹក្សាស្រុក ក្រុមការងារចុះមូលដ្ឋាន អភិបាលរងស្រុក មន្ត្រីរដ្ឋបាលស្រុកនិងអាជ្ញាធរក្នុងមូលដ្ឋាន។   អំណោយដ៏ថ្លៃថ្លារបស់រាជរដ្ឋាភិបាលកម្ពុជាតាមរយៈរដ្ឋបាលខេត្ត ដែលចែកជូនប្រជាពលរដ្ឋដែលកំពុងខ្វះខាតចំនួន ៤៨គ្រួសារ ។ ក្នុងមួយគ្រួសារទទួលបាន អង្ករ២៥គីឡូក្រាម  ត្រីខ១យួ និងទឹកត្រី១យួ ។ ថ្ងៃអង្គារ ០៨កើត ខែ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី២៨ ខែកក្កដា ឆ្នាំ២០២០ ។

មន្ទីរកិច្ចការនារីខេត្តកណ្តាល៖ នៅថ្ងៃព្រហស្បតិ៍៩រោច ខែស្រាពណ៍ ឆ្នាំជូត ទោស័កព.ស២៥៦៤ ត្រូវនឹងថ្ងៃទី ១៣ ខែសីហា ឆ្នាំ២០២០ មន្ទីរកិច្ចការនារីខេត្តកណ្តាល បានរៀបចំវេទិកាអប់រំសហគមន៍ ស្តីពីយេនឌ័រ និងសុខភាពភ្នែក ដល់ប្រជាពលរដ្ឋ នៅឃុំបួរមាស ស្រុកមុខកំពូល ដោយមានការឧបត្ថម្ភថវិកាពីអង្គការមូលនិធិហ្រេ្វតហូឡូ។  វេទិការនេះធ្វើឡើងក្រោមអធិបតីភាព លោកស្រីវេជ្ជបណ្ឌិត ឡេង មោនីភាព ប្រធាននាយកដ្ឋានស្រ្តី និងសុខភាព និងលោកស្រី ដឹម អេង អភិបាលរងស្រុក សរុបចំនួន ៤៥នាក់ (ស្រី្ត ១៦នាក់) ។   គោលបំណង៖ – ដើម្បីបង្កើន និងពង្រឹងការយល់ដឹងស្តីពី យេនឌ័រ និងភេទ – ស្វែងយល់ពីសារៈប្រយោជន៍ភ្នែក និងការថែទាំភ្នែក – ទីតាំងផ្តល់សេវា និងការបញ្ជូនទៅរកសេវាសុខភាពភ្នែកដល់ក្រុមបុរស និងក្មេងប្រុស ជនពិការ និងកុមារ។

មន្ទីរកិច្ចការនារីខេត្តកណ្តាល៖   ដើម្បីចូលរួមពង្រឹងក្នុងការការពារ ការឆ្លងរីករាលដាលនូវមេរោគ កូវីដ-១៩ លោកស្រី  ជុំ  ស៊ីណាត  បាន អមដំណើរ លោកជំទាវ ហ៊ុន កុសនី អភិបាលរងខេត្តកណ្ដាល ព្រមទាំងមន្ទីរជុំវិញខេត្ត និងអាជ្ញាធរក្រុងតាខ្មៅ បានចុះចែកម៉ាស និងសាប៊ូ ដល់កម្មករ កម្មការនី ចំនួន ២២១នាក់ កំពុងបម្រើការងារក្នុងរោងចក្រផលិតកាបូបគ្រប់ប្រភេទ ឌឹ ប៊ែកសាក់ ឯ.ក (The Bagsac Co.LTD) ។   សូមបញ្ជាក់ថា ក្នុងការចុះចែកម៉ាស និងសាប៊ូ ដល់កម្មករ កម្មការិនីទាំង ២២១នាក់ ក្នុងម្នាក់ទទួលបានសាប៊ូ១ដុំ និងម៉ាសចំនួន២ (ជាប្រភេទម៉ាស់ដែលអាចបោកទឹកប្រើប្រាស់ឡើងវិញបាន)។ ពិធីសំណេះសំណាលនេះ ធ្វើនៅរសៀលថ្ងៃទី៣០ ខែឧសភា ឆ្នាំ២០២០ ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ។

មន្ទីរកិច្ចការនារីខេត្តរតនគីរី៖ នាព្រឹកថ្ងៃអង្គារ ៧កើត ខែស្រាពណ៍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២៥ ខែសីហា គ.ស២០២០ ថ្នាក់ដឹកនាំមន្ទីរកិច្ចការនារី បានជួបសម្ភាសន៍ជាមួយអ្នកតំណាងការិយាល័យឧត្ដមស្នងការសហប្រជាជាតិទទួលបន្ទុកសិទ្ធិមនុស្ស (OHCHR) នៅកម្ពុជា ។   កិច្ចប្រជុំនេះមានគោលបំណង៖ – កំណត់បញ្ហា និងលំនាំពាក់ព័ន្ធនានា រួមទាំងឬសគល់ដើមហេតុនៃអំពើហិង្សា – ធ្វើការវិភាគផ្លូវច្បាប់ វិភាគទៅលើការឆ្លើយតបរបស់រាជរដ្ឋាភិបាលចំពោះករណីទាំងនេះ – កំណត់គំរូដែលមានលទ្ធផលជាវិជ្ជមានកន្លងមក។