ការចែកអំណោយដល់ស្ត្រី មានជីវភាពខ្វះខាត ជនពិការ ចាស់ជរា ជួបការលំបាក ចំនួន49 គ្រួសារ

មន្ទីរកិច្ចការនារីខេត្តប៉ៃលិន៖   មន្ទីរកិច្ចការនារីបានចូលរួមរៀបចំ ពិធីចែកអំណោយដល់គ្រួសារស្ត្រីងាយរងគ្រោះ និងផ្សព្វផ្សាយពីវិធីកាត់បន្ថយហានិភ័យពីការឆ្លងជំងឺកូវីដ ១៩ នៅឃុំទូ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។ ពិធីចែកអំណោយនេះមានការចូលរួមពី ឯកឧត្តម អភិបាលនៃគណៈអភិបាលខេត្ត សមាជិកក្រុមប្រឹក្សាស្រុក ក្រុមការងារចុះមូលដ្ឋាន អភិបាលរងស្រុក មន្ត្រីរដ្ឋបាលស្រុកនិងអាជ្ញាធរក្នុងមូលដ្ឋាន។   អំណោយដ៏ថ្លៃថ្លារបស់រាជរដ្ឋាភិបាលកម្ពុជាតាមរយៈរដ្ឋបាលខេត្ត ដែលចែកជូនប្រជាពលរដ្ឋដែលកំពុងខ្វះខាតចំនួន ៤៨គ្រួសារ ។ ក្នុងមួយគ្រួសារទទួលបាន អង្ករ២៥គីឡូក្រាម  ត្រីខ១យួ និងទឹកត្រី១យួ ។ ថ្ងៃអង្គារ ០៨កើត ខែ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី២៨ ខែកក្កដា ឆ្នាំ២០២០ ។

មន្ទីរកិច្ចការនារីខេត្តឧត្តរមានជ័យ៖   ថ្ងៃពុធ ១២រោច  ដល់ថ្ងៃពុធ ៤កើត ខែអាសាឍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី ១៧-២៤ ខែ មិថុនា ឆ្នាំ២០២០ មន្ទីរកិច្ចការនារីខេត្តឧត្តរមានជ័យ បានចុះសម្ភាសន៍ជាមួយ លោកចៅសង្កាត់  លោក/លោកស្រីមេឃុំ  និង  អ្នកទទួលបន្ទុក កិច្ចការនារី  និងកុមារឃុំ /សង្កាត់ ដើម្បីចុះធ្វើការសិក្សា និង ប្រមូលព័ត៌មាន ស្តីពីការងារបញ្ជ្រាបយេនឌ័រ ស្ថានភាពរបស់ស្រ្តី និងកុមារនៅថ្នាក់មូលដ្ឋាន។ មន្ទីរកិច្ចការនារីបានបន្តប្រមូលទិន្នន័យអំពើហិង្សា  ការជួញដូរស្រ្តី  និង កុមារ  និង ការរំលោភសេពសន្ថវៈ នៅថ្នាក់ឃុំ/សង្កាត់ទាំង ២៤ ទូទាំង ខេត្តឧត្តរមានជ័យ។

មន្ទីរកិច្ចការនារីខេត្តត្បូងឃ្មុំ៖   ការផ្សព្វផ្សាយអំពីច្បាប់ទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ បានរៀបចំឡើង ដោយមន្ទីរកិច្ចការនារីខេត្តត្បូងឃ្មុំ ដើម្បីឱ្យប្រជាពលរដ្ឋទទួលបានចំណេះដឹងស្តីពី ច្បាប់ទប់ស្កាត់អំពើហិង្សាក្នុងគ្រួសារ កិច្ចការពារជនរងគ្រោះ និងកាត់បន្ថយអំពើហិង្សាក្នុងគ្រួសារ។   ប្រជាពលរដ្ឋចំនួន៧៧ នាក់ (ស្រ្តី ៥៦នាក់)បានយល់ដឹងពី ផលប៉ះពាល់របស់អំពើហិង្សាក្នុងគ្រួសារ និងដឹងថាជនប្រព្រឹតិ្តអំពើហិង្សាត្រូវទទួលទោសចំពោះមុខច្បាប់ ។ ប្រជាពលរដ្ឋនឹងយល់ដឹងពីវិធីស្វែងរកជំនួយពីភូមិឃុំ ប្រសិនបើមានអំពើហិង្សាកើតឡើង។   ការផ្សព្វផ្សាយនេះ ធ្វើនៅថ្ងៃពុធ ១៣កើត ខែជេស្ឋ ឆ្នាំជូត ទោស័ក ពស ២៥៦៤ ឧបត្ថម្ភដោយគម្រោងដីសម្បទានសង្គមកិច្ច ។

មន្ទីរកិច្ចការនារីខេត្តព្រៃវែង៖ ពិធីចែកអំណោយមនុស្សធម៌របស់រាជរដ្ឋាភិបាលជូនដល់គ្រួសារក្រីក្រ   ចាស់ជរាគ្មានទីពឹង ពិការ បានទទួលអំណោយមនុស្សធម៌តាមរយៈ មន្ទីរកិច្ចការនារីខេត្តព្រៃវែងដល់ប្រជាពលរដ្ឋនៅស្រុកពោធិ៍រៀង ដើម្បីចូលរួមជួយសម្រួលជីវភាពរបស់ប្រជាពលរដ្ឋក្រីក្រ ស្របតាមគោលនយោបាយ របស់រាជរដ្ឋាភិបាលកម្ពុជា ។ អំណោយមនុស្សធម៌ដែលជាការឧបត្ថម្ភរបស់រាជរដ្ឋាភិបាល ត្រូវបានចែកជូនដល់បងប្អូនប្រជាពលរដ្ឋ មានដូចជា មុង ភួយ កន្ទេល អង្ករ មី ត្រីខ និងថវិកាសរុប ១៧៣ ៨៤៩ ៤០០៛។   លោកស្រីប្រធានមន្ទីរកិច្ចការនារីខេត្តព្រៃវែងមានប្រសាសន៍ផ្តាំផ្ញើរ ដល់ប្រជាពលរដ្ឋដូចខាងក្រោម៖ “សូមចេះការពារខ្លួនពីការឆ្លងវីរុសកូវីដ-19 ។ គ្រួសារនីមួយៗគួរបន្ថែមមុខរបរ ដូចជាការដាំបន្លែ ចិញ្ចឹមត្រី ចិញ្ចឹមសត្វ និងរស់នៅមានអនាម័យជាប្រចាំ។  ជាពិសេសបងប្អូនស្រ្តី បើមានបញ្ហាសុខភាព ត្រូវទៅមណ្ឌលសុខភាព ឬមន្ទីរពេទ្យ ចៀសវៀងទៅរកពេទ្យបុរាណដែលអាចបណ្ដាលឱ្យមានគ្រោះថ្នាក់ដល់អាយុជីវិត។ បងប្អូនប្រជាពលរដ្ឋបានថ្លែងអំណរគុណយ៉ាងខ្លាំងដល់ក្រុមការងារ និងពិសេសរាជរដ្ឋាភិបាលកម្ពុជា។ លោកមិនទុកប្រជាពលរដ្ឋឱ្យនៅឯកោ និងភាពអត់ឃ្លាននោះទេ ។ បើទោះស្ថិតក្នុងកាលៈទេសៈ បែបណាក៏ដោយ ។”   ពិធីចែកអំណោយនេះមានការចូលរួមពី មន្រ្តីមន្ទីរកិច្ចការនារី ថ្នាក់ដឹកនាំស្រុក ឃុំ ភូមិ អាជ្ញាធរពាក់ពន្ធ័និង ប្រជាពលរដ្ឋ…

មន្ទីរកិច្ចការនារីខេត្តបាត់ដំបង៖ វគ្គបណ្ដុះបណ្ដាលស្ដីពី សីលធម៌សង្គម និងបំណិនជីវិត រៀបចំដោយ មន្ទីរកិច្ចការនារីខេត្តបាត់ដំបង ក្រោមអធិបតីភាព លោកជំទាវ សុំ ចិន្ដា អភិបាលរងខេត្ត ។ វគ្គនេះមានគោលបំណងដូចខាងក្រោម៖ (១) ដើម្បីលើកកម្ពស់ សីលធម៌សង្គម តម្លៃស្រ្តី និងគ្រួសារខ្មែរ (២) លុបបំបាត់ ការរើសអើង និងកសាងភាពសុខដុមរមនាក្នុងគ្រួសារ និងសង្គម ។ (៣) លើកកម្ពស់ សមត្ថភាពស្រ្តី ដើម្បីចូលរួមក្នុងគ្រប់ដំណើរភារៈកិច្ចអភិវឌ្ឍន៍ជាតិ ប្រកបដោយសមធម៌ និងឈានទៅដល់សមភាពក្នុងគ្រួសារ និងសង្គមជាតិ អ្នកចូលរួមជាប្រធាន ឬអ្នកតំណាង មកពីការិយាល័យសង្គមនិងសុខុមាលភាពសង្គមក្រុង/ស្រុកចំនួន១៤ សរុបមានចំនួន ៣៥នាក់ (ស្រ្តី ៣១នាក់) ។

មន្ទីរកិច្ចការនារីខេត្តកណ្តាល៖   នៅថ្ងៃទី៤ ខែកញ្ញា ឆ្នាំ២០២០ មន្ទីរកិច្ចការនារីខេត្តកណ្តាល បានសួរសុខទុកកុមារីរងគ្រោះ និងគ្រួសារក្រីក្រ មានកូនភ្លោះ ក្រោមការដឹកនាំរបស់លោកជំទាវ នួន នារតី ដែលជាសមាជិកក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត ។   គ្រួសារចំនួន២ ទទួលអំណោយដូចជា៖ – គ្រួសារក្រីក្រមានកូនភ្លោះ ទទួលបាននូវ អង្ករ៥០គីឡូ មី១កេស ត្រីខ១ដុំ ទឹកត្រី១យួរ ម្ស៉ៅទឹកដោះគោឌុយមិច ២កំប៉ុង និងថវិកា១០ម៉ឺនរៀល។ – គ្រួសាររបស់កុមារីរងគ្រោះ ទទួលបាននូវ អង្ករ ៥០គីឡូ មី១កេស ត្រីខ១ដុំ ទឹកត្រី១យួរ និងថវិកា១០ម៉ឺនរៀល។