វគ្គបណ្តុះបណ្តាល ស្តីពី ការវិភាគយេនឌ័រនិងជំនាញសម្របសម្រួល

មន្ទីរកិច្ចការនារីខេត្តស្វាយរៀង៖   ការិយាល័យ សមភាពយេនឌ័រ  បានរៀបចំវគ្គបណ្តុះបណ្តាលស្តីពី  ការអភិវឌ្ឍសមត្ថភាពស្ត្រីជាថ្នាក់ដឹកនាំក្រុង/ស្រុក  ឃុំ/សង្កាត់  នៅសាលាស្រុក  កំពង់រោទិ៍  ក្រោមអធិបតីភាព លោកស្រី  ទុំ  សារានី  ប្រធានមន្ទីរកិច្ចការនារីខេត្ត  និងលោកស្រី  ពេជ  ចាន់លីន  អភិបាលរងស្រុកកំពង់រោទិ៍។   វគ្គបណ្តុះបណ្តាលនេះមានគោលបំណង៖ ១.បង្កើនការយល់ដឹងពីរបៀប ឬវិធីប្រមូលព័ត៌មានពីបញ្ហាប្រឈម ព្រមទាំងតម្រូវការរបស់ស្រ្តី និងកុមារនៅតាមមូលដ្ឋានរបស់ខ្លួន។ ២.ស្វែងយល់ និងវិភាគព័ត៌មានពាក់ព័ន្ធនានា   សិក្ខាកាមយល់ដឹងពីរបៀបធ្វើផែនការ វិនិយោគ៣ឆ្នាំរំកិលរបស់ឃុំ  ការស្វែងរក និងប្រមូលព័ត៌មាន ដើម្បីជាប្រភពទិន្នន័យដើម្បីធ្វើផែនការ និងដឹងពីតួនាទីនិងភារកិច្ចដែលត្រូវបំពេញ។   សមាសភាពចូលរួមមាន  លោកស្រីជាក្រុមប្រឹក្សាស្រុក  លោកស្រីទទួលបន្ទុកកិច្ចការស្រ្តី និងកុមារឃុំ   ការិយាល័យសង្គមកិច្ចនិងសុខុមាលភាពសង្គមស្រុក  កាលពី ថ្ងៃសុក្រ  ១៥កើត  ខែ ជេស្ឋ  ឆ្នាំជូត  ទោស័ក  ព.ស.២៥៦៤  ត្រូវនឹងថ្ងៃទី  ០៥  ខែ  មិថុនា  ឆ្នាំ២០២០។

មន្ទីរកិច្ចការនារីខេត្តឧត្តរមានជ័យ នាព្រឹកថ្ងៃអង្គារ ១០កើត  ខែអាសាឍ ឆ្នាំជូត ទោស័ក ពស២៥៦៤ ត្រូវនឹងថ្ងៃទី៣០ ខែមិថុនាឆ្នាំ២០២០នេះ នៅសាលប្រជុំមន្ទីរកិច្ចការនារីខេត្តឧត្តរមានជ័យបានរៀបចំកិច្ចប្រជុំ បណ្ដាញការងារយេនឌ័រថ្នាក់ក្រោមជាតិ ប្រចាំឆមាសទី១ ក្រោមអធិបតី លោកជំទាវ មុំ ពុទ្ធីតា អភិបាលរងនៃគណៈអភិបាលខេត្ត និងលោកជំទាវ ស្លោម គឹមឡន សមាជិកក្រុមប្រឹក្សាខេត្ត ជាប្រធាន គណៈកម្មាធិការពិគ្រោះយោបល់ស្រ្តី និងកុមារ (គ.ក.ស.ក) ។   កិច្ចប្រជុំនេះមានគោលបំណងចែករំលែកព័ត៌មាន បទពិសោធន៍ទាក់ទងទៅនឹងការអនុវត្តការងារបញ្ជ្រាបយេនឌ័រ និងបង្កើនភាពអង់អាចដល់ស្ត្រី តាមមន្ទីរវិស័យដោយមានសមាសភាពចូលរួមជាង ៤០ (ស្រី្ត ៣៥នាក់) ។   មន្ទីរតាមវិស័យនីមួយៗ បានធ្វើការពិភាក្សាលើបញ្ហាប្រឈម និងចែករំលែកបទពិសោធន៍ការអនុវត្ត ការងារបញ្ជ្រាបយេនឌ័រ ព្រមទាំងការបង្កើនភាពអង់អាចដល់ស្រ្តីនៅក្នុងអង្គភាព។ តារាងតាមដានភាពរីកចម្រើនស្ត្រីធ្វើសេចក្តីសម្រេចចិត្តនៅតាមមន្ទីរវិស័យត្រូវបានរៀបចំ ។

មន្ទីរកិច្ចការនារីខេត្តសៀមរាប៖   នៅព្រឹកថ្ងៃ សុក្រ ១០រោច ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែសីហា ឆ្នាំ២០២០ មន្ទីរកិច្ចការនារីខេត្តសៀមរាប សហការជាមួយរដ្ឋបាលសាលាស្រុកបន្ទាយស្រីនិងរដ្ឋបាលសាលាស្រុក សូទ្រនិគមន បានរៀបចំពិធីប្រគល់ទទួលសម្ភារការពារជំងឺកូវីដ-១៩ និងសម្ភារផ្សព្វផ្សាយព័ត៌មានឆ្លើយតបចំពោះអំពើហិង្សាទាក់ទងនឹងយេនឌ័រ នៅថ្នាក់មូលដ្ឋាន ក្រោមជំនួយឧបត្ថម្ភពីរដ្ឋាភិបាលប្រទេសអូស្ត្រាលី-កម្ពុជា ដើម្បីផ្តល់សេវាប្រកបដោយនិរន្តរភាព និងសមធម៌ ហៅកាត់ថាកម្មវិធី ACCESS។   ពិធីប្រគល់សម្ភារៈនេះបាន គោលបំណង បង្កើនការយល់ដឹងដល់អ្នកផ្តល់សេវា និងប្រជាពលរដ្ឋទូទៅអំពីបញ្ហាជំងឺកូវីដ-១៩ និងវិធីសាស្រ្តការពារ ធ្វើការផ្សព្វផ្សាយពីសេវាឆ្លើយតបទាន់ហេតុការណ៍ជួយជនរងគ្រោះ ដោយអំពើហិង្សាទាក់ទងនឹងយេនឌ័រ ក្នុងកំឡុងពេលនៃការរីករាលដាលបញ្ហាជំងឺឆ្លងកូវីដ-១៩ ដល់អ្នកផ្តល់សេវា GBV នៅថ្នាក់មូលដ្ឋាន និងស្រ្តីដែលងាយរងគ្រោះ ។   កម្មវិធីនេះប្រព្រឹត្តទៅក្រោមអធិបតីភាព លោកស្រីជាថ្នាក់ដឹកនាំមន្ទីរកិច្ចការនារីខេត្ត  លោកស្រីអភិបាលរងនៃគណៈអភិបាលស្រុក ព្រមទាំងមានការចូលរួមពី សមាជិកក្រុមប្រឹក្សាស្រុក លោក លោកស្រី មេឃុំ អ្នកទទួលបន្ទុកកិច្ចការនារីនិងកុមារឃុំដែលមានចំនួនចូលរួមសរុប ៤៤ នាក់ (ស្រ្តី ៣១នាក់)។ សម្ភារសរុបដែលបានចែកជូនទៅដល់អ្នកផ្តល់សេវាថ្នាក់ស្រុក ឃុំ និងសម្រាប់ចែកជូនបន្តដល់ស្រ្តីដែលរងគ្រោះដោយអំពើហិង្សាទាក់ទងនឹងយេនឌ័រ និងស្រ្តីដែលមានពិការភាព…

មន្ទីរកិច្ចការនារីខេត្តស្វាយរៀង៖   ប្រធាន មន្ទីរកិច្ចការនារីខេត្ត បានចូលរួមកិច្ចប្រជុំពិភាក្សា  ពង្រឹងវិធានការទប់ស្កាត់  និងគ្រប់គ្រងពលករឆ្លងដែនទៅប្រទេសវៀតណាមដោយខុសច្បាប់  នៅទីស្នាក់ការច្រកទ្វារព្រំដែនអន្តរជាតិបាវិត  ក្រោមអធិបតីភាពលោកជំទាវ  ឯក  សុវណ្ណភារៈ  អភិបាលរងនៃគណៈអភិបាលខេត្ត   និងជាអនុប្រធានអចិន្ត្រៃយ៍គ.ខ.ប.ជ។   កិច្ចប្រជុំនេះមានការចូលរួមពី លោក  លោកស្រី ប្រធានមន្ទីរពាក់ព័ន្ធ  និងអាជ្ញាធរច្រកព្រំដែនអន្តរជាតិបាវិត  វត្តមានសរុប  ២០ នាក់  (ស្រី្ត ៨នាក់) ។ កិច្ចប្រជុំនេះមានគោលបំណង  ពិភាក្សាពង្រឹងវិធានការទប់ស្កាត់  និងគ្រប់គ្រងពលករឆ្លងដែនទៅប្រទេសវៀតណាមដោយខុសច្បាប់  និងបញ្ហាប្រឈមមួយចំនួនពាក់ព័ន្ធការវិលត្រឡប់  និងនីតិវិធីនៃការគ្រប់គ្រងលំហូរពលករឆ្លងកាត់ព្រំដែនដែលព្យាយាមឆ្លងដែនទៅមកដោយខុសច្បាប់  ព្រមទាំងផ្សព្វផ្សាយពីវិធានការលេខ  ១៣៩៦  ស.ជ.ណ. របស់ក្រសួងមហាផ្ទៃផងដែរ។   ថ្ងៃចន្ទ  ៧កើត  ខែស្រាពណ៍  ឆ្នាំជូត  ទោស័ក  ព.ស.២៥៦៤  ត្រូវនឹងថ្ងៃទី  ២៧  ខែ  កក្កដា ឆ្នាំ២០២០ ។

មន្ទីរកិច្ចការនារីខេត្តកែប៖ នៅព្រឹកថ្ងៃទី៨ ខែកញ្ញា ឆ្នាំ២០២០ ថ្នាក់ដឹកនាំ និងមន្រ្តីរបស់មន្ទីរកិច្ចការនារីខេត្តកែប បានទទួលសម្ភារ:ការពារជំងឺកូវីដ-១៩ និងសម្ភារ:ផ្សព្វផ្សាយពត៌មានស្តីពី ការចូលរួមទប់ស្កាត់ជំងឺកូវីដ-១៩ អាពាហ៍ពិពាហ៍វ័យកុមារ និងការចិញ្ចឹមកូនបែបវិជ្ជមាន ដល់ស្រ្តីងាយរងគ្រោះ និងសហគមន៍ពីក្រសួងកិច្ចការនារី ។   ពិធីនេះធ្វើឡើងក្រោមអធិបតីភាពរបស់ លោកជំទាវ ញាណ សុចិត្រា អគ្គនាយកអភិវឌ្ឍន៍សង្គម នៃក្រសួងកិច្ចការនារី និងមានការអញ្ជើញចូលរួមពីលោកស្រី អភិបាលរងស្រុកដំណាក់ចង្អើរ និងសហការី (សម្ភារៈនេះសម្រាប់ផ្តល់ជូន ភូមិចំនួន ០៥ ក្នុងឃុំពងទឹក) ។   សម្ភារៈដែលបានផ្តល់ជូនរួមមាន: សាប៊ូ ខិតប័ណ្ណ ផ្ទាំងរូបភាព និងUSB។

មន្ទីរកិច្ចការនារីខេត្តឧត្តរមានជ័យ៖   ថ្ងៃពុធ ១២រោច  ដល់ថ្ងៃពុធ ៤កើត ខែអាសាឍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី ១៧-២៤ ខែ មិថុនា ឆ្នាំ២០២០ មន្ទីរកិច្ចការនារីខេត្តឧត្តរមានជ័យ បានចុះសម្ភាសន៍ជាមួយ លោកចៅសង្កាត់  លោក/លោកស្រីមេឃុំ  និង  អ្នកទទួលបន្ទុក កិច្ចការនារី  និងកុមារឃុំ /សង្កាត់ ដើម្បីចុះធ្វើការសិក្សា និង ប្រមូលព័ត៌មាន ស្តីពីការងារបញ្ជ្រាបយេនឌ័រ ស្ថានភាពរបស់ស្រ្តី និងកុមារនៅថ្នាក់មូលដ្ឋាន។ មន្ទីរកិច្ចការនារីបានបន្តប្រមូលទិន្នន័យអំពើហិង្សា  ការជួញដូរស្រ្តី  និង កុមារ  និង ការរំលោភសេពសន្ថវៈ នៅថ្នាក់ឃុំ/សង្កាត់ទាំង ២៤ ទូទាំង ខេត្តឧត្តរមានជ័យ។