ព័ត៌មាន

ក្រសួងកិច្ចការនារី បានបើកវគ្គបណ្តុះបណ្តាល ស្តីពី ការលើកកម្ពស់កិច្ចការពារជនពិការ ដែលឆ្លើយតបនឹង យេនឌ័រ នៅសណ្ឋាគារ ពេជ្រដា ខេត្តមណ្ឌលគីរី ក្រោមអធិបតីភាព លោកជំទាវ ញែម មរកត អនុរដ្ឋលេខា ក្រសួងកិច្ចការនារី កាលពីថ្ងៃទី១៦ ដល់ថ្ងៃទី១៨ ខែសីហា ឆ្នាំ ២០១៧ ។   វគ្គនេះមានគោលបំណង បង្កើនការយល់ដឹងនិងកំណត់រកវិធានការនានា ក្នុងការលើកកម្ពស់កិច្ចការពារជនពិការ ដែលឆ្លើយតប នឹងយេនឌ័រ ដល់មន្ត្រីក្រសួងកិច្ចការនារី និងក្រសួងស្ថាប័នពាក់ព័ន្ធ។ សមាសភាពចូលមកពីក្រសួងនិងមន្ទីរ ពាក់ពន្ធ័មាន៖ ១-ក្រសួងពាណិជ្ជកម្ម ២-ក្រសួងឧស្សាហកម្ម និងសិប្បកម្ម ៣-ក្រសួងអប់រំយុវជន និងកីឡា ៤-ក្រសួងវប្បធម៌និង វិចិត្រសិល្បៈ និងមន្ទីរខេត្តក្រចេះ ស្ទឹងត្រែង កំពង់ស្ពឺ រតនគីរី ត្បូងឃ្មុំ ព្រៃវែង ស្វាយរៀង តាកែវ ព្រះសីហនុ កោះកុង កំពត កែប និងមន្ទីរកិច្ចការនារីខេត្តមណ្ឌលគីរី សរុបចំនួន49នាក់ (ស្ត្រី៣៩នាក់)។​

កាលពីថ្ងៃទី១៦ ដល់១៨ ខែសីហា ឆ្នាំ២០១៧ ក្រុមប្រឹក្សាជាតិដើម្បីស្ត្រី(ក.ជ.ក.ស) បានរៀបចំ វគ្គបណ្តុះបណ្តាលស្តីពីការអនុវត្តអនុសញ្ញាស៊ី-ដ “ការលុបបំបាត់រាល់ទម្រង់នៃការរើសរើងប្រឆាំងនឹងនារីភេទ” និង អនុសាសន៍ដ៏ខ្ពង់ខ្ពស់របស់សមេ្តចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលបំណងជំរុញលើការអនុវត្តអនុសញ្ញា ស៊ី-ដ (CEDAW) អោយមានសង្គតិភាពទៅនឹង ច្បាប់ជាតិនិងគោលនយោបាយនានា របស់រាជរដ្ឋាភិបាល និងដើម្បីពិនិត្យមើលឡើងពិនិត្យមើលឡើងវិញលើភាពខ្វះចន្លោះតាមរយៈរបាយការណ៍ជាតិលើកទី៤ និងទី៥នៃការអនុវត្តអនុសញ្ញា ស៊ី-ដ (CEDAW) នៅប្រទេសកម្ពុជា។ វគ្គបណ្តុះបណ្តាលនេះ ប្រារព្ធឡើងក្រោមអធិបតីភាព លោកជំទាវ តាន់ វួចឆេង រដ្ឋលេខាធិការក្រសួងសុខាភិបាល និងជាសមាជិកា ក.ជ.ក.ស លោកជំទាវ ប៊ុន ឈិតវាសនា អគ្គលេខាធិការ នៃអគ្គលេខាធិការដ្ឋានអចិន្ត្រែយ៍ ក.ជ.ក.ស និងលោកជំទាវ កែវ សាវឿន អភិបាលរងនៃគណៈអភិបាលខេត្តរតនៈគិរី និងមានសមាសភាពចូលរួមសរុប ៦០នាក់ (ប្រុស១៨នាក់) មកពីមន្ទីរពាក់ព័ន្ធចំនួន៥ខេត្តគឺ់ ខេត្តស្ទឹងត្រែង មណ្ឌលគិរី ក្រចេះ ត្បូងឃ្មុំ និងខេត្តរតនៈគិរី ដែលជាខេត្តគោលដៅ។ វគ្គបណ្តុះបណ្តាលនេះ ធ្វើនៅសាលប្រជុំសាលាខេត្តរតនៈគិរី។

នាយកដ្ឋានការពារផ្លូវច្បាប់នៃក្រសួងកិច្ចការនារី បានរៀបចំវគ្គបណ្តុះបណ្តាលស្តីពី ការទប់ស្កាត់ការរំលោភបំពានផ្លូវភេទលើស្ត្រី និងកុមារដល់គ្រូបង្គោលថ្នាក់តំបន់នៅខេត្តកំពង់ឆ្នាំង ចាប់ផ្តើមពីថ្ងៃទី១៥ ដល់ថ្ងៃទី១៧ ខែសីហា ឆ្នាំ២០១៧ ក្នុងគោលបំណងផ្តល់ចំណេះដឹង និងបទពិសោធន៏មួយចំនួនដល់ថ្នាក់ខេត្ត ឃុំ សង្កាត់ ស្រុក ខណ្ឌ និងប្រជាពលរដ្ឋនៅក្នុងមូលដ្ឋានក្នុងការទប់ស្កាត់ការរំលោភបំពានផ្លូវភេទលើស្ត្រី និងកុមារនៅកម្ពុជា ឲ្យមានប្រសិទ្ឋិភាពខ្ពស់ និងជួយជនរងគ្រោះបានទាន់ពេលវេលា។ វគ្គបណ្តុបណ្តាលនេះប្រារព្វធ្វើឡើងក្រោមអធិបតីភាពលោកជំទាវទេស ច័ន្ទសារឿន អនុរដ្ឋលេខាធិការក្រសួងកិច្ចការ ។ ក្នុងវគ្គនេះមានសិក្ខាកាមចូលរួមសរុបចំនួន៤៥នាក់ ក្នុងនោះបុរសមានចំនួន៣នាក់ ដែលជាមន្រ្តីបង្គោលថ្នាក់ក្រោមជាតិមកពីមន្ទីរកិច្ចការនារីចំនួន៧រាជធានី- ខេត្ត មានកណ្តាល ត្បូងឃ្មុំ ស្វាយរៀង ព្រៃវែង កំពង់ចាម កំពង់ឆ្នាំងជាខេត្តម្ចាស់ផ្ទះ និងមន្ត្រីក្រសួងកិច្ចការនារី។

វគ្គបណ្តុះបណ្តាល រយៈពេលបីថ្ងៃ ដល់ជនបង្គោលថ្នាក់តំបន់ស្តីពីការជួញដូរមនុស្ស រៀបចំដោយនាយកដ្ឋានការពារផ្លូវច្បាប់ នៃក្រសួងកិច្ចការនារី(កកន) បានចាប់ផ្តើមបើកកាលពីថ្ងៃចន្ទ ទី១៤ ខែសីហា ឆ្នាំ២០១៧ នៅមន្ទីរកិច្ចការនារី ខេត្តស្វាយរៀង។ វគ្គបណ្តុះបណ្តាលនេះប្រារព្ធធ្វើក្រោមអធិបតីភាព លោកជំទាវ សាន្ត អរុណ រដ្ឋលេខាធិការ ក្រសួងកិច្ចការនារី លោកជំទាវ ពៅ សុភាព អភិបាលរងនៃគណៈអភិបាលខេត្តស្វាយរៀង លោកស្រី ភួង សារី ប្រធានមន្ទីរកិច្ចការនារី ខេត្តស្វាយរៀង។ ក្នុងវគ្គសិក្សានេះមានសិក្ខាកាមចូលរួម ៤២នាក់ (ប្រុស៥នាក់) សុទ្ធតែជាមន្រ្តីបង្គោលថ្នាក់ក្រោមជាតិមកពីមន្ទីរកិច្ចការនារីចំនួន៧ មានខេត្តកំពង់ចាម ត្បូងឃ្មុំ ព្រៃវែង កំពង់ឆ្នាំង កណ្តាល រាជធានីភ្នំពេញ និងខេត្តស្វាយរៀងជាម្ចាស់ផ្ទះ ក្នុងគោលបំណងដើម្បីបង្កើនសមត្ថភាពមន្ត្រីបង្គោលទាំងនោះអោយមានលទ្ធភាពអាចធ្វើសកម្មភាពថ្នាក់តំបន់ដើម្បីទប់ស្កាត់អំពើជួញដូរមនុស្ស ជាពិសេសការធ្វើចំណាក់ស្រុកអោយកាន់តែមានប្រសិទ្ធិភាពល្អ។ ច្បាប់ស្តីពីការបង្រ្កាបការជួញដូរមនុស្ស និងការធ្វើអាជីវកម្មផ្លូវភេទ ត្រូវបានដាក់អោយប្រើប្រាស់កាលពីឆ្នាំ២០០៨។ អំពើជួញដូរមនុស្សជាអំពើល្មើសច្បាប់ព្រហ្មទណ្ឌ ជនណាដែលលក់ដូរមនុស្សត្រូវផ្តន្ធាទោសដាក់ពន្ធធានាគារពីប្រាំពីរ(៧)ដល់១៥(ដប់ប្រាំ)ឆ្នាំ ប្រសិនជនរងគ្រោះជាអនិតិជនត្រូវដាក់ពន្ធធានាគារពី១៥ឆ្នាំដល់២០ឆ្នាំ។

ថ្ងៃទី២ ខែសីហា ឆ្នាំ២០១៧ នៅខេត្តព្រះសីហនុ នាយកដ្ឋានសមភាពយេនឌ័រ ក្រសួងកិច្ចការនារី បានបើកវគ្គបណ្តុះបណ្តាលស្តីពីភាពជាអ្នកដឹកនាំ និងគ្រប់គ្រង ដល់អ្នកដឹកនាំក្រសួង និងមន្ទីរកិច្ចការនារី រាជធានីខេត្ត ក្រោមអធិបតីភាព លោកជំទាវ ឃឹម ចំរើន​រដ្ឋលេខាធិការ ក្រសួងកិច្ចការ នារី លោកជំទាវ គួច ចន្ថា សមាជិកា​ក្រុមប្រឹក្សាខេត្តព្រះសីហនុ និងលោកជំទាវ ហៀក ហ៊ីមុល្លី អភិបាលរងនៃគណៈអភិបាល​ខេត្តព្រះសីហនុ។ វគ្គបណ្តុះបណ្តាលនេះ មានគោលបំណងដើម្បីអភិវឌ្ឍសមត្ថ ភាពប្រធាន អនុប្រធានការិយាល័យ ក្រសួង និងមន្ទីរកិច្ចការនារីរាជធានីខេត្ត ស្តីពីភាពជាអ្នកដឹកនាំនិងគ្រប់គ្រងក្នុងការអនុវត្តការងារប្រកបដោយប្រសិទ្ធភាព និងមានសមាសភាពចូលរួមជាមន្ត្រី អនុប្រធាននិងប្រធានការិយាល័យ និងអនុប្រធានមន្ទីរ មកពីទីស្តីការក្រសួង ខេត្តតាកែវ កណ្តាល កំពង់ស្ពឺ កែប ព្រះសីហនុ និងខេត្តកំពត សរុប ៤៩នាក់ (ស្ត្រី៣៧នាក់)។​